UNHA CHEA DE XENTIÑA CON XEITO PARA TRABALLAR!!!

Estimado Óscar:

Na Presidencia da Xunta de Galicia recibimos o seu correo electrónico no que manifestaba o seu interese en expoñer o traballo realizado polo alumnado de 2º e 3º de Educación Primaria do CEIP Sagrado Corazón de Lugo durante estes meses de confinamento.

Permítame que, ante todo e aínda cunha certa demora que espero poidan desculpar, lles transmita o noso sincero agradecemento por poñerse en contacto connosco para facernos chegar a súa proposta, así como unha pequena mostra deste interesante proxecto que ten como finalidade a promoción socio-cultural da cidade de Lugo e os seus arredores.

Desde logo a súa iniciativa demostra un gran interese polo desenvolvemento educativo e a formación dos seus alumnos e alumnas. Anímolles a continuar desenvolvendo este tipo de actividades, tan importantes para a súa aprendizaxe, que sen dúbida contribuirán a que coñezan e valoren o patrimonio cultural e artístico da nosa comunidade.

Somos conscientes do gran esforzo e dedicación que están a facer vostedes e os seus compañeiros para manter a actividade nestes difíciles momentos que estamos a vivir, apoiando e motivando ao alumnado. Grazas ao traballo e entrega de docentes coma vostedes, así como ao de moitos outros sectores da nosa sociedade, Galicia vai saír de esta crise sanitaria máis reforzada e unida.

Respecto á súa proposta, infórmolle que dei traslado do seu contido á Consellería de Educación, Universidade e Formación Profesional, para o seu coñecemento.

Reitérolle a nosa gratitude e aproveito a ocasión para enviarlles un cordial saúdo, que fago extensivo aos alumnos e alumnas que participaron neste traballo.

O secretario xeral da Presidencia