Óscar Fernández Fernández

Este traballo fíxose no curso 2020/21, no último trimestre do ano académico pasado, nas circunstancias que tod@s coñecemos. O traballo foi feito por alumnado do CEIP Sagrado Corazón de Lugo, colexio que contaba nesas datas cuns medios tecnolóxicos completamente deficientes, nulos.

O barrio do CEIP está no extraradio da cidade, e o alumnado reafirma a palabra diversidade, tendo os medios máis xustos posibles. Traballamos coa nosa "xentiña" dende móbiles con tarxeta, repartindo polas casas as tarefas e recollendo o material en "coches patrulla", comunicándonos en árabe, rumano ou catalán coas nosas familias. Unha verdadeira odisea que nos fixo aprender e crecer como mestres/as.

Coa aprendizaxe de servizos (APS) como identidade, cunha mestra de inglés que nos permitiu chegar a onde non contabamos, un técnico experto en TIC, unhas titoras con moita imaxinación e unha xentiña con inmensas ganas de traballar chegamos máis aló do centro, do barrio e da cidade. Traballamos o currículo achegando optimismo e un sorriso á cidade, ó barrio e ás nosas colaboradoras familias.

O resto, incluído o agradecemento da Conselleira polo esforzo do alumnado, pódeno ver no enlace do noso portfolio Agueiro.