Ante esta realidade, nace “Clics seguros en Zas”, unha campaña promovida polo alumnado de ESO das materias de Tecnoloxía e Dixitalización. O proxecto busca reducir a fenda dixital desde dúas frontes: formar ás persoas maiores da contorna no uso seguro das TIC e concienciar ás de menor idade  sobre unha navegación responsable.

Para logralo, cada un dos cursos de Educación Secundaria Obrigatoria ten unha misión:

 

• O alumnado de 1º, 2º e 3º da ESO encargarase de crear os contidos formativos e materiais da campaña. Ademais, consideramos importante coñecer a realidade máis próxima de primeira man, polo que cada estudante entrevistou a persoas da súa contorna máis próxima sobre o uso das tecnoloxías.

 

• O alumnado de 4º da ESO desenvolverá os soportes dixitais mediante deseño e impresión 3D. Ademais, vai investigar o papel do voluntariado virtual como ferramenta para combater a fenda dixital e coa información achada, crearán material que permita dar a coñecer este tipo de iniciativas.

A campaña chegará á comunidade a través da web do centro, presentacións e colaboración con entidades locais. Ademais, todas as persoas que colaboraron co noso alumnado, recibirán a documentación creada que lle axude a resolver as súas dúbidas e/ou medos no manexo das contornas dixitais.

A educación dixital non pode quedar só nas aulas: queremos que o noso coñecemento sirva para mellorar a vida das persoas que nos rodean.