O primeiro día de clase soubemos que este ano iamos traballar todos xuntos e xuntas nun proxecto que parte dun elemento do patrimonio da nosa localidade pertencente a unha época moi remota: a Prehistoria!
Para situármonos ben no tempo, organizamos unha actividade por equipos compostos por membros de todos os niveis educativos. Cada equipo recibiu un plano cun punto sinalando un lugar concreto da escola, ao que debían acudir para tratar de localizar un "tesouro" agochado aí polo profesorado.
Unha vez os equipos atoparon cadanseu sobre, abrírono e descubriron unha serie de tarxetas con imaxes correspondentes a diferentes etapas da Historia. Coa colaboración de todos os membros do grupo, cada equipo organizou as súas tarxetas ao longo dunha liña do tempo.
Para rematar, xuntamos as tarxetas das pequenas liñas do tempo dos diferentes equipos para conformar unha gran liña do tempo máis completa entre todos e todas.