Unha vez aprendemos a montar circuítos eléctricos en papel e coñecemos a orixe e o significado das principais constelacións observables no ceo, pasamos a debuxar e montar algunhas das máis interesantes.
Na clase dos maiores, durante varias sesións ao longo do mes de novembro, deseñamos e iluminamos a osa maior e a osa menor.
Calcamos, en primeiro lugar, a silueta destas dúas figuras cunha pintura branca sobre unha cartolina negra. Debuxamos tamén o esquema das constelacións no seu interior.
A continuación, furamos a cartolina nos puntos correspondentes á posición de cada estrela. O seguinte paso foi debuxar o bosquexo do circuíto eléctrico en paralelo, aclarando o sentido de circulación da electricidade (polaridade e posición das luces LED).
Cando tivemos claro isto, só nos quedou montar o circuíto, conectar a pila para comprobar que as pequenas lámpadas se iluminaban!