O seguinte paso ao traballo con circuítos en papel e á realización de postais de nadal con circuítos cosidos sobre feltro quixemos dalo na materia de Ciencias Sociais.
Ao alumnado de 4º tocáballes estudar a xeografía galega; ao de 5º, a española; e a 6º, a de Europa. Polo tanto, recortamos nunha cartolina A3 verde as siluetas destes tres territorios e pegámolas sobre unha cartolina A3 azul.
A continuación, marcamos no noso mapa os principais sistemas montañosos e ríos e moldeámolos con plastilina condutora.
Para rematar os mapas, furamos as cartolinas para e introducimos anacos de fío metálico atravesando polos lugares onde cadran os accidentes xeográficos elaborados con plastilina. Así puidemos conectar mediante pinzas de crocodilo cada un destes accidentes a unha placa Makey Makey programable cos nosos ultraportátiles.
Paralelamente, buscamos información sobre oito elementos do relevo (catro sistemas montañosos e catro ríos) e gravamos un audio con información sobre cada un deles.
Por último, usando o aplicativo Scratch, programamos a placa Makey Makey de xeito que, ao pecharmos cada un dos circuítos eléctricos tocando coas nosas mans sobre a plastilina, poidamos escoitar a información de cada un dos accidentes xeográficos.