Radio 23-24

Ola a todos! Aquí presentamos unha mostra do traballo que fixemos neste curso na radio. Agardamos que desfrutedes tanto escoitándonos coma nós gravando!

Os nenos de 6º elaboraron colectivamente uns contos, coa consigna de que o encargado de iniciar o conto era o responsable de rematalo, poñerlle título e gravalo na radio. Aquí están os resultados!

No comezo do curso, os nenos de 6º investigaron sobre o número de ouro a pàrtir da serie de Fibonacci. Parece algo complicado, pero en realidade é... apaixonante. Escoitemos o programa que fixeron a partir do investigado.

Os nenos e nenas de 4 e 5 anos crearon, escribiron, ilustraron e gravaron este conto no que demostran que  monstros, bruxas e demáis criaturas tamén poden facer a súa vida máis saudable.

Nenos e nenas de todos os niveis xuntáronse no día da celebración de Samaín para elaborar uns contos terroríficos! Despois gravámolos con música e efectos de son para que impresionaran todavía máis!

O alumnado de 6º gravou  e editou uns contos para nenos e nenas en castelán para logo practicar a tradución simultánea. Así os nenos e nenas aprenderon a editar o audio coa música... e que a tradución simultánea é moi complicada! Os resultados do experimento foron moi diversos... pero os contos orixinais quedaron moi bonitos!

Un ano máis recibimos a subvención de Fondo Galego de Garantía Agraria (Fogga) para desfrutar de leite e froita na merenda do recreo. Como o leite había que ir buscalo ao comedor, os nenos e nenas de 4 e 5 anos fixeron un anuncio para non esquecerse no recreo, e outro cando acabou o período en cuestión.

No Día da Paz non podiamos esquecer un dos máis recentes e relevantes conflitos armados que se dan na actualidade, que é o que se está desenvolvendo en Gaza.

Os nenos e nenas de 4º imaxinaron, escribiron e gravaron estes contos saudables, enmarcados dentro do proxecto integrado levado a cabo no centro a través da biblioteca escolar.

Co gallo da celebración do día de Rosalía de Castro, os nenos e nenas de 6º quixeron fusionar un dos seus poemas máis coñecidos co xénero urbano, utilizando unha base dunha canción de Residente. Tócalles aos nosos ouvintes xulgar o resultado!

Os nenos e nenas de Infantil, 1º e 2º  estiveron coñecendo as interioridades da radio e aprendendo un montón da man do mestre Santiago García Nieto, que veu varios días ao centro para axudar a realizar os que para moitos e moitas son os seus primeiros programas de radio. Aquí vai unha mostra do traballo realizado.

Dalia, Keyla e Sofía nos regalaron estas dúas cancións a pura voz e coiro: O verdegaio e Ai, Manuel! A bailar!

Aproveitando a conmemoración do día da muller traballadora, os nenos e nenas de 6º investigaron sobre a figura de Ethel Smyth, compositora e figura importante do movemento sufraxista. Con todo o aprendido fixeron un mural e un programa de radio.

O proxecto integrado da biblioteca escolar para este curso 2023/2024 estaba centrado na vida saudable. Por isto os rapaces e rapazas de 4º fixeron un traballo de campo sobre este tema e expuxeron os seus resultados no programa que aquí nos traen.

Aquí traemos un conto elaborado e gravado polos nenos de 3º.

Este curso celebramos os maios cunhas coplas escritas para a ocasión sobre a base dos Maios de Redondela. Para facilitarlles a aprendizaxe ao resto dos cursos, os nenos e nenas de 4º ofrecéronse a gravar a canción nos estudios centrais de Radio Rosiña.

Os nenos e nenas de 3º a 6º estiveron formándose un ano máis en radio escolar da man de Jennifer Chamadoira e Lorena Boga, da ONG Ayuda en acción, a quenes lle agradecemos un ano máis a súa excelente labor e a boa disposición. Ademais este ano contamos coa colaboración de Verónica Couto, como representante da organización Agareso. Con elas elaboráronse e graváronse programas baixo a temática da vida saudable que constituíu o proxecto integrado de Biblioteca deste ano. Aquí tedes os programas de cada curso en doble formato, completo e reducido, para todos os gustos.

Todo o mundo ten claro que cancións lle gustan. Pero... por que nos gusta unha canción? Esta pregunta tal vez sexa máis difícil de responder.

Os rapaces e rapazas de 5º e 6º entrevistaron aos adultos do colexio para coñecer as súas cancións favoritas. O que obtiveron foron conversas cheas de emocións, recordos, bo humos e, sobre todo... música!