Obradoiro de compostaxe con Adega

ADEGA é unha das asociacións que máis traballa pola defensa da natureza en Galicia. Entre as persoas que forman parte da mesma está María, unha rapaza que nos visitou en dúas ocasións para contarnos en que consiste a compostaxe. Este curso, centrado na pegada ecolóxica, parecíanos moi interesante que os residuos orgánicos que xeramos no centro non acabaran no colector. Por que non facer compost? Foi así como contactamos coa Asociación, e María acompañounos en dúas xornadas formativas para o alumnado de Infantil e Primaria. Na primeira delas falounos da importancia de reducir o consumo (de plástico dun só uso especialmente), de reutilizar todas aquelas cousas que poidamos e de reciclar adecuadamente cada material cando non lle atopemos outra utilidade. Na segunda sesión contounos en que consistía a compostaxe, e trouxo unha mostra de compost que o alumnado puido analizar en pequenos grupos, descubrindo así como insectos diferentes (miñocas, bichos bola, tixeiretas, ácaros...) se encargan de descompoñer os restos dos nosos alimentos de xeito espectacular. Ademais, María asesorou tamén ás cociñeiras e ao profesorado sobre a colocación do composteiro e o seu mantemento.

Foron dúas xornadas moi interesantes nas que aprendemos moitísimo. Agradecemos desde aquí a María a súa paciencia para contarnos e animarnos a compostar!!! Comezamos?