Radio

8 de xuño de 2023. Unha data para lembrar entre o alumnado de 5º e 6º de Primaria. Grazas á ONG Ayuda en Acción, que desenvolve no noso cole o proxecto RTV Enxebre da man de Sergio Pascual, este curso deseñamos un programa de investigación sobre o Prestige. Partindo do tema do proxecto, a pegada ecolóxica, e tendo en conta que no 2022 se cumpriron 20 anos do afundimento do citado petroleiro, en 5º e 6º quixeron coñecer que sucedera e pensar que podemos facer como sociedade para que iso non volva a pasar.

No 1º trimestre comezou este proceso, guiado principalmente por Sergio, e así fomos a Muxía para facer algunhas entrevistas a persoas moi relacionadas con esa catástrofe. O programa final tivo lugar no Museo da Pesca de Fisterra, onde nos recibiu unha persoa entrañable: Manolo López, o guía do museo, aínda que para nós será sempre o poeta de Fisterra, Alexandre Nerium. Tamén nos acompañou Isabel Tomé, unha mestra que daba clase nun cole de Primaria de Muxía cando o Prestige derramou miles de toneladas de petróleo na costa galega. A experiencia foi marabillosa, e todo grazas ao esforzo deste grupo de nenos e nenas de 5º e 6º, pero por suposto tamén a Sergio e a Jenni e Lorena de Ayuda en Acción, que nos acompañaron durante todo o proceso e xestionaron a posibilidade de entrevistar a todas estas persoas así como de encargarse de pagar o transporte para desplazarnos a eses lugares.

Imaxinamos que estades desexando escoitar o programa, así que imos alá!!!

Este curso 2023, adicóuselle o Día das Letras Galegas adicóuselle a Francisco Fernández del Riego. No cole, entre outras actividades, tamén gravamos varios podcasts falando sobre este intelectual galego: un no que colaboraron conxuntamente os grupos de Infantil, 1º e 2º de primaria; outro realizado polo alumnado de 3º e 4º, e un máis do que se encargaron os nenos e nenas de 5º e 6º. Os tres audios enviáronse ao V Concurso de podcasts-Radio na biblio, en colaboración coa CRTVG (Radio Galega), e un deles recibiu un dos premios que se concederon: a entrevista que guionizaron na aula de 3º e 4º para coñecer moitas das facetas e vivencias do autor homenaxeado. Celebramos con alegría ese premio, pero tamén quero dar a en hora boa a todas as persoas que participaron na elaboración de todos estes traballos, xa que o maior premio é escoitarvos en cada un dos programas que facedes para Radio Rosiña!!!

Nos vindeiros días os podcasts seleccionados serán difundidos pola Radio Galega a través da súa páxina www.diariocultural.gal, así como noutros medios da Consellería, pero os nosos podedes escoitalos aquí mesmo!!

O 7 de abril celebrouse o Día Mundial da Saúde, e o alumnado de 1º, 2º, 3º e 4º de primaria traballaron contidos de Lingua Galega e Ciencias da Natureza, ademais dos proxectos anuais "A pegada ecolóxica" e "Naturézate". A partir de aí, elaboraron o radiofaladoiro "A natureza cóidanos", a través do cal expoñen a relación entre o coidado do medio ambiente e a nosa saúde. Verdadeiramente interesante, así que non perdades a oportunidade de escoitalos neste programa de Radio Rosiña.

Despois das vacacións, comezamos o 3º trimestre cunha actividade que nos fai moita ilusión: un programa de radio!!! Desde que formamos parte de Radio na biblio, cada curso recibimos a formación de diferentes profesionais, que nos van ensinando diferentes maneiras de traballar con este medio de comunicación. Este curso recibimos a Damián, un rapaz que forma parte de Ponte nas Ondas, unha asociación que leva case tres décadas promovendo a cultura galega e do norte de Portugal, e difundindo o patrimonio cultural que compartimos.

Damián estivo con nós toda a xornada, ensinando ao alumnado de 5º e 6º o manexo dun programa de gravación (Audacity), contándolles a todas as nenas e nenos de 3º a 6º algúns trucos para empregar a voz en múltiples situacións, e sorprendéndonos coa súa profesión: actor de dobraxe!!!

Tamén fixemos algúns programas en directo: en 1º e 2º prepararon un concurso radiofónico sobre espazos naturais de Galicia, mentras que os de 3º, 4º, 5º e 6º deseñaron un programa de variedades no que cada sección estaba centrada nun tema que elixiron en parellas.

Aquí podedes escoitar o resultado desta xornada na que o pasamos francamente ben e na que aprendemos moitísimo. Desde aquí agradecemos a Damián todo o que nos aportou, desexando que leve tan bo recordo coma o que deixou en nós!!!

Estamos cheas de emoción con esta noticia: gravamos un programa para Radio Voz!!! Este curso fomos convidadas a participar nesta experiencia que non esqueceremos. O alumnado de 5º e 6º deseñou un programa centrado na natureza e a poesía, para o cal convidaron aos nenos e nenas de Infantil para que recitaran algúns poemas na radio escolar. Ademais, elixiron a algunhas persoas do cole (alumnado doutros cursos, profesorado, cociñeiras, nais...) para facerlles algunhas preguntas relacionadas con este tema. Con todo ese material preparado, recibimos a Antía e Sonia, locutora e técnico de son de Radio Voz, coas que gravaron en falso directo un programa que quedou estupendo. E como sempre quedan cousiñas sen rematar, foron os propios nenos e nenas de 5º e 6º -principalmente Soraya e Iker- quenes se encargaron de editalo para enviar á radio, onde foi retransmitido para toda Galicia o 23 de marzo no programa “La tarde es tuya”.

Se non puidestes escoitalo, podedes facelo a través deste enlace:

https://www.radiovoz.com/archivo/podcast/1/radionabiblio/

Tamén podedes escoitalo e descargalo directamente desde aquí.

Unha aperta enorme e en hora boa a todas as persoas que facilitaron que esta actividade se levara a cabo. Grazas tamén a Antía e Sonia, pola paciencia ante as dificultades imprevistas e polo ánimo que nos amosaron en todo momento!!!

En 1º, 2º, 3º e 4º, recibiron a visita na aula dalgunhas das súas familias para falarlles sobre os seus traballos, temática tratada na área de Ciencias Sociais. Contáronlles cousas moi interesantes e aproveitaron a visita para realizarlles unha pequena entrevista para Radio Rosiña, con preguntas elaboradas previamente na área de Lingua Galega.

Moitas grazas a todos/as por animarvos a participar!