Día de Rosalía de Castro
O 23 de febreiro de 1837 naceu en Santiago unha das poetas máis destacadas da nosa literatura: Rosalía de Castro. No cole, un ano máis, participamos na proposta que realiza a Asociación de Escritoras e Escritores en Lingua Galega (AELG). Para esta edición, Carme Adán foi a persoa encargada de redactar o Manifesto, acompañado do lema “Cumpriuse a xustiza”.
Tendo en conta a idea da AELG, en Educación Infantil prepararon o poema "O moucho" que tanto lles gusta escribíndoo e acompañándoo con imaxes do rostro de Rosalía e dun moucho, creando unha fermosa colaxe.
Na aula de 1º e 2º o poema elixido foi “Adiós ríos, adiós fontes”, que escribiron e ilustraron ao tempo que o aprenderon de memoria para recitalo a través das ondas, nunha gravación que podedes escoitar na parte inferior desta entrada.
En 3º e 4º elixiron cinco poemas que ilustraron de xeito moi creativo (poesía visual) e que tamén gravaron na radio. Podedes escoitalos tamén ao final da páxina. Ademais, unha das nenas da aula realizou un mural sobre a biografía da nosa protagonista.
Por último, en 5º e 6º falaron das inxustizas do mundo que nos rodea. De todas elas, decidiron seleccionar as que facían referencia ao mundo natural. Partindo desa observación preocupante, e da pregunta proposta pola AELG “Que diría Rosalía?”, modificaron algúns dos versos da poeta para reescribilos como se foran a propia Rosalía vivindo na nosa época. O resultado desas composicións gravárono en Radio Rosiña e expuxérono nun mural que recolle os poemas traballados.
Para colocalo, prepararon tamén unha instalación, que é un tipo de arte que utiliza o espazo no que se coloca (paredes, teitos, chan…) xunto con outros elementos. O que trata de facer unha instalación é que a persoa espectadora interactúe coa obra: que se mova ao seu redor, que reflexione sobre o seu significado, etc. Podedes escoitar o resultado premendo nos enlaces que atopades a continuación.
Estupendo traballo para homenaxear a unha poeta da que debemos sentirnos moi orgullosas!!! Non deixedes de ler a Rosalía!!!