A BIBLIOTECA ENCHEUSE DE BICHOS!!!
Esta mañá recibimos na biblioteca a Miguel, un biólogo namorado dos insectos que realizou un obradoiro no cole para amosarnos este grupo de animais tan descoñecido a pesar de ser o grupo de seres vivos máis abundante da Terra. Ademais de contarnos algunhas das súas características (de onde son orixinarios, como se reproducen, canto tempo viven, de que se alimentan, etc.), algúns deles tivemos a oportunidade de tocalos, o que nos fixo unha ilusión enorme!!! Pero Miguel tamén nos fixo reflexionar sobre algo moi, moi importante: a necesidade de coidar a natureza para que estes animais sigan cumplindo a súa imprescindible función dentro dos ecosistemas. Grazas a eles realízase a polinización,a descomposición de moita materia vexetal, aliméntanse moitas outras especies e mesmo contribúen á saúde humana.
A verdade é que foi toda unha experiencia poder ver esta diversidade de bichos na nosa biblioteca: insectos pau, cascudas, escaravellos, a bolboreta máis grande que se coñece, caracois, cangrexos, milpés... E un escorpión e unha tarántula, que foron tal vez os que máis fixeron abrir os ollos a todas as persoas que pasamos polo obradoiro.
Moitísimas grazas a Miguel por amosar con tanta paciencia e con tanto cariño todos estes marabillosos e sorprendentes bichos!!!